堅！！

由細到大　無論任何時候　對住任何人我都好少會講大話　
唔係話我唔識講大話　而係因為我覺得　大話唔係講完就算　
一個大話要令人相信　又要諗又要扮又要夾時間　係好麻煩嘅一件事黎
所以好多時　我會選擇乜都唔講　好過去為左呃一個人而搞咁多野

但係好得意地　從來我嘅說話都好難令人相信　
無論我講乜野都好　好多人都會抱住半信半疑既態度黎聽
有時候　甚至會直接地選擇唔信我所講嘅說話添
其實我明白點解　因為我講說話嘅時候　即使係好認真嘅事我都會用平常嘅態度講出口
所以其他人唔信都唔出奇　反正我都係抱住「信就信　唔信就算」呢個信念黎講說話


　

痔瘡

痛．．．好痛．．．好很痛．．．好很柒痛．．．實在非常痛．．．痛到真係想喊．．．

原來生痔瘡真係好痛苦好難受．．．
在我黎講，果種痛苦程度係我由出世到而家人生的痛苦中的十名以內　僅次於牙痛．．．

如坐針毯　坐立難安都算喇．．．
仲要呢幾日特別多屎屙　每次去屙嘅時候都攞我命咁．．．
去完要抆既時候，簡直好似唔係用廁紙黎抆　係用把刀黎抆咁
每抆一下　屎眼就有俾刀片緊咁感覺．．．

所以呢幾日我就有一個領悟，就係個肚唔痛到仆街我都唔會開大．．．
真係情願忍到結石都唔想去．．．

就算過左屙屎呢一關．．．想去訓覺都有個大問題．．．
痔瘡痛，真係痛到唔係超級眼訓都訓唔著架．．．

唉～～呢種日子仲要唔知頂幾耐添架．．．真係陰公．．．．．

研究生

今日 我用左足足一日時間去研究點樣o係個扑度放歌
雖然係就係俾我試到點樣放到首歌上黎 但係我仲係唔多滿意
因為而家只可以o係主頁度放得果一首歌咁大把
離我諗住可以放一堆歌上黎嘅目標仲差好遠呢...

不過都唔好睇少呢一首歌 佢好話唔好聽都叫做有成績啦
正所謂「今日嘅一小步 就係他日嘅一大步」
由我呢個電腦白痴 一手一腳放到首歌上黎真係一D都唔易架
淨係上網搵教學都搵到我死死下...

不過話時話 咁做會唔會有版權問題我真係唔多清楚
如果真係有問題嘅話 單聲我知 等我拿拿聲刪左佢
免得俾人告丫嘛

傷信

重讀著妳的告別信 抑壓了暗湧
雖不信寫的話 竟可以這麼重 但再哭亦無用

徐徐又當這信是妳 緊貼我抱擁
可惜信太單薄 怎可填密落空
越信傷早抑壓痛使越沉重

難平衡自己 忐忑的起伏
難原諒我心 反覆的變動
是我個性舞擺換來這封信
曾令你瘋舊情要一別而盡

仍多麼需要你 仍多麼需要你
如今天失去了怎麼退怎麼進
如果可不要信 寧死都不要信
但看我手再激動仍只得傷信....

～～～～～～～～～～～～～～～

開住個扑發呆既時候 電腦咁o岩播到呢首歌 咁就打左出黎喇...

～～～～～～～～～～～～～～～

小弟好不幸 出世至今都未收過傷信...

再諗真D...除左電話費單 水費單 電費單呢類信之外...

原來 我成世人只收過一封信...我只記得係由三奶寄俾我既

內容我真係完全唔記得 唔知係咪傷信

但肯定就算係傷信都唔會傷得去邊

如果可以我都想記得返黎回味下

講返傷信先 其實一直以來我都好想知道 收傷信係乜野感覺

我有想像過如果有人俾封傷信我 當我一路睇一路喊既時候

發現到信裡面有幾個字化開晒 好似寫信果個一路寫一路喊

眼淚滴到D字化開晒 果種心痛 果種不捨 應該都幾淒美下

可惜 我冇呢種信....如果唔係 我諗我應該會將封信當寶一樣

收得好埋 收得好密 非必要都唔拎返出黎

而信既內容 我會收o係心底 可能會識背都唔定添...

仲有最重要就係 通常呢種會令人喊住寫喊住睇既信

多數內容都係講分手果類野先得傷既.....

所以我覺得 叫傷信做分手信都不為過吧

你話丫 淨係想像都咁浪漫喇 真係收到既話仲唔人都癲咩...

～～～～～～～～～～～～～～～～～

真係純粹聽聽下歌聽到陳奕迅首傷信有感而發...
悶親大家唔好凸我哦...

歌

當分離在即 相隔遙遠兩極 要別去的只能加倍地愛惜
好像雙手一放 雖然充滿盼望 生命都給牽走一片最好的
將感情累積 別離才有價值 掛念會將生活空與白著了色
身在天邊海角 思念不會缺席 再見為了他朝更親暱
讓前路越去越有方向
想將感動你的歌唱多一遍 眼前無端一閃亮帶一點茫然
也許我的眼淺 還是不捨得你望見
想好好地看清楚每一張臉 眼前靈光一閃像照片般留存
來讓你的好鑲進心底好到永遠
燈依然未熄 鍵琴仍要努力 最後這一曲無需軟弱像歎息
不是種種改變 都能通過試煉
我信讓我緊握過的手 十年後亦會令我溫暖
還想將感動你的歌唱多一遍 眼前無端一閃亮帶一點茫然
強忍過的掛牽流落於腮邊
還想好好地看清楚每一張臉 眼前靈光一閃像照片般留存
連淚眼昏花　都似千顆璀璨美鑽～

～～～～～～～～～～～～～～～～～～～～～～～

上面堆字其實係一首歌 一首我好鍾意既歌

咁點解我今日會特別打上個扑度呢...?

唔知...唔好問!!

講返首歌先

講真我覺得呢首歌既歌詞真係相當唔錯

特別係呢句「將感情累積 別離才有價值 掛念會將生活空與白著了色」

呢句D詞真係填得好有意思

而事實上 掛念的確係會將白色果部份著左色

有人紅色...有人黃色...有人青色...有人灰色(可多選)

咁「空與白」個空呢?點解佢冇填埋呢?

其實佢係用「著了色」答左架喇

因為掛念一個人既時候

有人會特登自己上色而令自己冇空

亦有人會為左令到自己褪色而冇空

甚至有人會自己上完色再走去褪色而令自己非常冇空...


我曾經係第三種....

而你 又會係邊種呢?

這只是藉口

「我睇唔到我地嘅將來」..我今日有幸又再一次聽到呢句經典說話

雖然今次亦都係由一個女仔講俾我聽，不過同上次唔同嘅係..

呢句說話裡面嘅「我地」 呢次冇我份....因為今次嘅主角係我朋友


但當我每一次聽到呢句「我睇唔到我地嘅將來」嘅時候

就算係唔係同我講都好 我都會覺得火滾.....

究竟點樣樣嘅將來 先叫做有將來呢?

呢個問題 由我第一次聽到之後 直到而家我都答唔到...

還是根本呢句說話只不過係一個奇怪嘅分手藉口?

的確 當初我第一次聽到呢句說話時 就連我自己都覺得佢講得幾o岩

因為事實上我當時真係冇做過任何一件會令佢覺得有將來嘅事

但今次事件嘅主角 相比起我的話....佢絕對係一個80%好男友 100%好老公

可能 佢同我一樣 學歷唔高 只能做d粗重工作 過去又唔係好見得人

但至少佢勤力 至少佢收入穩定 至少佢唔會去滾 至少佢冇乜不良嗜好

最多佢都係小賭一下唧 除此之外佢平時真係乖到乜咁架啦...

但依然同我一樣...聽同一句說話 行同一條路...

你話呢句「我睇唔到我地嘅將來」係咪高深莫測呢...


由最初開始 「妳們」都應該已經知道 「我們」嘅過去已經令將來成了定局...
既然如此 當初何必堅持走下去呢?
既然當初堅持 何必又半途而廢呢?

心聲

今日 如果要將我心裡面既說話只用一個字去講俾妳聽
我想大聲地對妳講 : 「屌」

今日 如果要將我心裡面既說話只用兩個字去講俾妳聽
我想大聲地對妳講 : 「臭西」

今日 如果要將我心裡面既說話只用三個字去講俾妳聽
我想大聲地對妳講 : 「正仆街」

今日 如果要將我心裡面既說話只用四個字去講俾妳聽
我想溫柔地對妳講 : 「生日快樂」

夜晚

小弟我好鍾意夜晚

雖然 一到夜晚真係冇野好做
電視又冇野好睇 出街又冇野好玩
但係 對於我黎講出唔出街都冇所謂啦
因為我唔鍾意飲酒 又唔鍾意落d...

咁夜晚對於我黎講 有咩好呢?
其實真係冇野好...
不過 我就係鍾意夜晚乜都冇
乜都冇既夜晚 個感覺好自由
因為其他人已經訓死晒
唔會有人理我做緊乜 唔會有人理我o係邊度
就好似我唔屬於呢個世界一樣
對其他人黎講 可能會好無聊 可能真係好悶
但係 夜晚既我真係唔多怕悶

我可以望住條街發呆咁又過得一晚
我可以直頭走落街行黎行去咁又過得一晚
我可以上網乜都睇下咁又過得一晚
我可以灘o係張床諗下野咁又過得一晚
我可以聽下收音機咁又過得一晚
我可以番睇下D舊書咁又過得一晚
我可以摷下野食咁睇下碟咁又過得一晚

咁其實 夜晚又唔係真係冇野好做丫
偶爾一晚半晚唔想咁樣既話
咪訓死佢囉 一樣過得一晚架...


今晚最後想講既就係: 生日快樂呀 二奶

細佬

我有一個好好既細佬 不過我同佢唔係同一個老豆老母生既
但係 我真係當佢係我細佬 我親人一樣

可能因為佢生得奀挑鬼命 正宗油浸都唔肥 又唔係好高
個樣又唔差 講野又夠圓滑 俾人感覺佢冇乜殺傷力咁
所以佢身邊既人都好錫佢 好保護佢(其實係俾佢呃晒)
同埋佢都幾勤力 際遇又幾好 所以都算係一帆風順既
再加上佢有一個唔錯既老婆 幾錫佢既老豆 幾睇佢既老細
o係今時今日既香港地 佢既人生都算美滿啦

其實 有時我真係幾羨慕佢
我羨慕既 唔係佢既際遇 唔係佢既一帆風順
唔係佢有個好老婆 唔係有個錫佢既老豆 唔係有個好老細
我只羨慕佢一樣野 就係佢既身材....
因為我係一個肥仔 同佢一齊出街見佢步履都輕盈過人
而我 就好似一個大肚婆咁 行兩步就要坐陣先 真係幾煩...

曾幾何時 我同佢一齊出街 經常會有人問我地係咪兩兄弟
男又好 女又好 呢條問題我地兩個聽過無數次
一直以來 我地兩個都唔覺我地外表有乜咁似
高度唔似 身形唔似 個樣雖然都係靚仔樣 但都唔同種類
試過有次 有個警察查我地身份証 明明拎住兩張証睇
都要問我地係咪兩兄弟.. 聰明如我地兩個都唔識點答佢...

整整下 o係外人眼中 我地唯一既分別就係外型
又試過有人問 點解佢咁細粒 我咁大件
我就答 因為佢成日唔食野 乜都隊晒俾我食
終於佢越黎越廋 我就越黎越肥咁
講出黎真係有人信.......邊吹得佢漲

其實要講我地似既地方 都係屋企裡面最細果個掛..
除左呢樣.....我諗....應該冇啦.....


講真啦 我地兩個最似既地方係...
所以好多時 我真係同佢冇乜野好講
就算一齊出街 我地兩個都唔多傾計既 真架!!
唔知咁講有冇人信呢....我講真架喎...


不過呢世都唔好懷疑我地兩個既....
感情 ?友情?親情?手足情?兄弟情?愛情?
(細佬..我地係邊樣呀?唔好答我是攬彈呀..我知你會咁答架!!)
我地兩個好堅貞架!!冇人可以拆散我地架!!

最後想同弟婦講講 我同你老公有好多不可告人既秘密架
妳想唔想知?特別係東涌就有個特大既秘密添!!
真係想知就問問妳老公啦!! 嘿嘿嘿～～

莫使金樽空對月

一直以來 小弟我都唔鍾意飲酒 無論開唔開心時所飲既酒
無論乜野場合有人叫我飲酒 我多數都推得就推...

成日都聽到有人講話 飲醉之後可以忘記令佢唔開心既事
可以忘記令佢唔開心既人..講到酒呢樣野好似好無敵咁
但大多數有事要忘記而去飲酒既人
佢地既原因 好多都係自己攞黎衰既

一個人 要忘記一個佢自己攞黎衰既過程
飲酒帶出黎既效果 其實係非常差既
就算 當飲醉之後真係好似好得好忘記到咁
咁係因為果一刻連自己姓乜都唔知先以為真係忘記到
到第二日酒醒 發現自己嘔到一地都係果陣
就會知道 因為想忘記一個自己攞黎衰既過程去飲酒
而引發另一個更加攞黎衰既過程(抹地) 係幾咁笨實
計我話 如果真係咁想忘記 真係要自殺先有效果
其他任何方法 真係冇用 就連時間都幫唔到手....



開心時飲酒 無可否認真係可以助興
一大班人 男男女女一齊飲酒一齊玩
少許醉意的確可以令人玩得更放更開心
無論放既係身又好心又好乜野都好
總之就係冇得頂 特別對於男人黎講就更加誇啦啦

咁點解我開心時飲既酒都要推呢?
其實係因為我對酒精敏感 飲完之後會生粒粒好痕好辛苦
另外就係 基於我偉大既父性 使到我要照顧飲醉酒既孩子
好令到她們知道回家的路嘛....

不過 我又唔係話真係成世人都未飲過 未醉過
我都有試過醉到不省人事 要人扶先返到屋企
亦都有試過令到其他人不省人事 要我扶佢返我屋企...

問題:
你覺得被人扶返屋企好D?定扶人返屋企好D呢?

冒險

今日睇番一套好耐之前既電影
係一套大概係講冒險既電影
片名係"八十日環遊世界"
睇完之後 突然諗起細細個既時候
原來 曾幾何時 我都係一個愛冒險既人

細個既時候我就已經好曳
唔鍾意讀書 唔願返屋企
鍾意同埋幾個朋友周圍走
幾歲人仔玩通頂 明知玩飽返到屋企實俾老母打到飛起
但係我驚都未驚過 當時我亦都冇諗過我老母有幾擔心
由細個到而家 我既座右銘都係"玩完先算"
我相信我身邊好多朋友既座右銘同我一樣

我同我d朋友 真係乜都玩得餐
可以係街市檔口頂笠幾個紙皮箱堆堆砌砌就當係秘密基地
可以幾條傻仔夜媽媽由碼頭行行行到去市中心再行返轉頭
可以搭巴士果陣 扮晒前面d大人個仔 借頭借路上埋去搭免費車
去其中一條傻仔個阿婆屋企 個傻仔就屈佢阿婆錢
再俾我地幾個人屈個傻仔請我地去荔園齊齊玩
玩清袋之後再山長水遠咁由麥理浩徑行八九個鐘行返屋企...

呢種咁充滿冒險味道既日子 陪伴左我好多個年頭
不過當我慢慢咁長大 相對地 阻止我去冒險既理由亦慢慢增多

我唔再因為堆起幾個紙皮箱捐入去玩就開開心心過得晚
因為而家我捐上床訓覺會開心好多

我唔會再夜媽媽咁行去市中心再行返屋企
因為而家我街都唔願出

我搭巴士唔可以再扮其他搭客個仔去搭免費車
因為就算扮到其他人個仔 牛龜咁大件都係要俾錢

我唔可以再叫果條傻仔屈佢阿婆錢
因為我同佢冇做朋友好耐好耐

我唔可以再去荔園
因為荔園都拆左好耐

雖然 我既冒險聽落好似完左咁樣
但其實 我同佢久唔久都仲有去下冒險架!!! 我仲得架!!!

睡房

小弟有一間奇怪既睡房 呢間奇怪既睡房面積雖然好細
但作為一間奇怪既睡房 佢還可以放到幾個書櫃仔
放到一部電視仔 一部爛電腦 一張雙人床
外加一棵包好封好入埋箱既大聖誕樹
呢間奇怪既睡房聽落好似好大咁 但其實 真係好細

一個咁樣樣既睡房有乜咁奇怪呢?
其實 奇怪既地方唔係呢個睡房擺放既物品
而係 唔屬於呢個睡房既物體...


有蛇蟲鼠蟻 有飛禽走獸 有日常用品 有衫褲鞋襪


點解有蛇蟲鼠蟻
可能因為我屋企近山 再加上我習慣開大隻窗
到左夏天夜晚 就有好多轟炸機一樣既小飛蟲飛入黎
一到落雨日子 飛蟻大軍就會出擊...
所以 講到捉蟲 直頭係我強項
而蛇鼠呢 係冇既 夾硬話有 就係有蛇頭鼠眼既我存在啦


點解有飛禽走獸
我形容緊既 其實係......人
但唔係我既家人 亦都唔係我既朋友
更加唔係我既情人 咁會係咩人呢? 答案係 路人
我自己都唔知道 點解我間房會有路人
我唔知道呢堆路人幾時黎 更加唔知道佢地幾時走
我有時甚至連呢堆路人既名都唔知道
佢地既出現 基本上唔會影響到我既生活
佢地既消失 我亦都唔會有乜野特別既感覺
所以 我用了飛走黎形容佢地
用禽獸黎形容自己.....


房裡面有日常用品 本來好平常
呢d日常用品入面 有護膚品 有香水
有洗頭水 有沐浴露 有洗面乳 可謂應有盡有
奇就奇在 呢d日常用品 全部都唔係我用既....
用得奇黎形容 當然都唔會係我既家人用架啦
其實 係我張床用既.....
唔知點解 我張床好鍾意呢堆物品 可能因為好香既關係啦
有好幾次 我試過包好晒呢堆物品 拎住佢行到去門口打算掉架喇
點知 路過廚房 唔覺意放低包野飲啖水唧
包野又會自動自覺咁 返晒去原位 好似根本冇郁過一樣
所以 久而久之 我都懶得再拎去掉喇


講到衫褲鞋襪 又係好平常會出現於房間既野黎
但奇怪既地方 同上面既物品一樣 又係唔屬於我同我家人既
對於呢堆衫褲鞋襪
其實 係同日常用品一樣 係由同一個人帶黎既
呢個係咩人?係一個魔術師 而且仲係好勁果隻
我相信 果個大衛什麼飛 都係跟佢學野架咋
呢個魔術師有乜咁勁?
佢勁就勁在 明明睇住佢兩手空空咁入房
但係佢走既時候 間房會無啦啦多左d野
果d野 有時係鞋 有時係襪 有時係牛孖筋 有時係底衫褲
有時係化妝品 有時係首飾 有時係公仔 真係多到數唔晒
呢個魔術師 唔止咁少料

佢仲可以勁到 明明係我身後緊緊咁跟住我
但又可以突然去到我眼前
明明係我眼前 但又可以突然消失
明明已經消失 但又可以一閃而過
明明一閃而過 但又可以活靈活現
呢位咁勁既魔術師 帶俾我如夢似幻既感覺
呢位咁勁既魔術師 留低既物品就如同佢主人一樣咁勁
唔理我間房有冇空位 佢一樣可以藏身
唔理仲有冇空位 佢話黎就黎 話走就走
呢位魔術師 真係勁到冇人有 最起碼對我黎講佢真係好勁


呢間睡房 雖然好細又好亂
雖然好多奇奇怪怪既野
但係我好鍾意呢間房俾到我既感覺 回憶 味道

雖然 真係好細

雖然 有時真係令到我好亂

感覺

因為一d原因 令我諗起同我已經分開好耐好耐既佢
呢個曾經同我一齊八年時間既佢
本來如果唔係d乜野特別日子都唔會再諗起
不過今日唔係特別日子
只係因為我細佬無啦啦唔知執乜鬼野執左佢張相出黎
跟住打電話俾我 好鬼馬咁同我講今日見到佢
而令到我再一次諗起佢....

唔知點解 每次諗起佢 感覺都唔同

試過因為自己無聊 拎返同佢一齊影既相出黎睇
感覺係心痛

試過因為執房 執到去有關佢既野果陣
感覺係麻煩

試過因為生日 佢打電話俾我同我講生日快樂
感覺係開心

試過因為同佢傾電話 到差唔多要收線果陣
感覺係唔捨得

試過因為從朋友口中 知道佢同現任男朋友近況
感覺係詛咒佢

試過因為去到某d佢經常去既地方
感覺係好怕撞到佢

試過因為去到以前同佢經常去既地方
感覺係好想見到佢

試過因為聽純鋼琴音樂既時候
感覺係好想聽佢再彈琴

試過因為我老豆走左既關係 我同佢再見面 當我攬住佢既時候
感覺係冇感覺

過去有好多時候 我會因為一d好小既事而諗起佢
但係分開越耐 諗起佢既情況越少
慢慢咁 唔係d乜野特別日子 根本唔會諗起

而今日 就因為我細佬執到好耐之前既相
令到我再一次諗起佢

當時我仲同佢一齊緊
係我生日果陣時同佢影落既合照黎
我記得 呢張相 呢個生日 係佢最後一次陪我過既生日

相入面 我攬住佢 仲攬得好實 佢好靚 但我好似黑緊面.....
我記唔起點解我會黑面..... 算啦 唔諗喇

睇完呢張相 今次點解有呢個感覺 我唔知道
可能因為相入面我攬住佢掛 大概係咁上下啦

所以 感覺真係幾甜

萬般皆下品 唯有讀書高

各位鍾唔鍾意睇書?我自己就好鍾意喇
好多朋友認為我淨係識得睇漫畫...
其實,我係乜書都睇 由八婆雜誌到天文地理
由歷史到政治 由開天闢地到世界末日
我睇過既書 係真係好多....

而睇得最多既 相信會係小說..
而小說當中...我睇得最多既..係愛情小說......

睇愛情小說唔係因為我真係咁鍾意睇
只不過係因為我老母 我家姐由細到大
都好習慣性地 每日都會租一堆小說黎睇
而佢地又會好冇手尾 拎本書去廁所痾住睇
去完喇 個人出黎本書唔係跟住出黎
到我去果陣 就會好順手咁拿起黎睇..

今日 我如常去廁所時順手地拎起兩本書黎睇
第一本睇既 係一本八婆雜誌
睇左大概4分1左右 我發現一件事
呢件事令我冇睇落去 令我去做一件無聊事

一本雜誌 嚴格黎講 佢都係叫做書
全書有192頁 廣告佔左117頁 大多數係修身廣告
電視節目表加電視劇情又佔左17頁
淨低果58頁
全部都係d乜乜女星走光 物物男星搞基

一本咁樣樣既"書"
意義上黎講 仲可唔可以叫做書?
定係佢根本就係一本修身指南 不過加小小內容?

而咁樣既"書" 點解仲有咁多人買?
明明就真係一d內容都冇
買黎應該都唔會係睇內容 相信都唔係睇廣告啦
唔通真係咁想睇節目表?
呢種文化真係好奇怪......

第二本 係一本亦舒既小說
書名叫"吻所有女孩" 睇書名 以為係一本愛情小說
但係 內容大概係講 一個男仔冇晒親人 自食其力
由於冇乜學歷 唯有入一間大機構做派信員
由於佢既沉默 誠實 可靠 有責任 做到野
令到佢o係呢間機構90%女職員都好信任佢
n咁多個追求者 個個都天姿國色
不過佢既信念係對女仔要溫柔 唔一定要擁有
所以送到埋口都唔受媾....
老闆又好賞識佢 又升職又加薪咁
不過由於佢越做得耐 就越覺得間野黑暗
所以最後決定浪跡天涯 四處為家.....

睇完全本書 我第一個感覺係佢好似我細佬...
扮晒誠實 專搵笨柒 留精不留情 唔使講人性

其實本書係想講 男人要對女人好 就會有人鍾意
唔使講學歷 唔使講錢 只要對女人好就得
如果想升職 就要誠實可靠 咁就升架喇
唔使講學歷 唔使講經驗 一樣升得快過火箭

所以話 幻想既世界係幾咁美好
現實中 想追個女仔 過五關斬六將都未必追到
幻想中 唔使錢都有靚女送到埋口邊..

現實中 冇學歷唔好講話升職 入職都有問題
就算有學歷 唔做返三五七年 其間表現優異 都唔好諗有得升
幻想中 乜都唔掂 只要做幾個月 一樣火箭咁

幻想中 誠實就係一切
現實中 誠實就聽乞米

所以最後 我終於知道 點解我咁霉....

淚....?

大家有冇喊過?因咩事喊?
有冇試過發夢喊到醒左?

我琴晚訓覺發左個夢...
可能個夢真係好慘,所以今日訓醒我成面濕晒....

不過發夢係好奇怪既一件事
發果陣明明身歷其境一樣
但係一訓醒 九成好難記返起夢過d乜
不過我夠勁,琴晚個慘夢 我仲好記得依稀記得到果部份!!

地點我唔知o係邊度黎 不過個地方冰天雪地既
我相信唔係南極就係北極 再唔係就係西伯利亞
點解我會估呢三個地方?
因為冰天雪地既地方我淨係知呢三個......

內容係我o係果度係釣緊魚既
釣釣下我唔知做乜鬼趺左落水

[夢裡面既我]好積極地想游返上岸
點解我要括住夢裡面既我呢幾隻字?
因為現實既我係好積極想死既人,
積極生存好難發生o係我身上.........

講返個夢先
話說我正積極地游返上岸之際
水面竟然快速咁結晒冰
我一路掙扎 一路下沉
雙眼入水,雙耳入水,個鼻入水,個口飲水...
未等到夢裡面既我沉到落水底,我就醒左喇

呢個慘夢雖然唔知慘o係邊
但係我塊面濕到真係妝都溶埋
仔細d黎講,係近窗一帶全部都濕晒...
於是我伸伸懶腰...慢慢..慢慢咁起身....關返隻窗
之後就行出間房....見到老母好休閒咁睇緊電視
我就問一問佢:咁大雨做乜唔同我關窗...
佢答我話:o下!!落緊雨咩!!
之後佢就衝左去收衫....
而我.....就好慘咁又換床單又換枕頭套又剩咁喇...

ps.個夢仲有其他人陪我一齊死.不過我唔記得左係邊個,所以唔提

第一次

第一次寫blog 我發現我其實真係一個幾悶既人
因為我實在唔知可以寫d乜
而事實上 我就正如大部份人一樣 生活平凡
身邊亦都冇乜特別事發生過 所以都唔會有什麼啟發
所以在呢個前提之下 呢個blog我會當佢(日/周/月/季/年/)記咁打
點解會係(日/周/月/季/年)記? 因為我自己都唔知幾時先有野好打....

不過今次係第一次 就隆重其視 是但吹吹佢好了

今日老母煲番薯糖水食 正當我甜到入心咁食之際
突然諗到 曾經我都係一粒番薯黎
由細到大 老實講 我真係冇野叻
唔係講笑 我讀書唔叻 人際關係唔叻 工作能力唔叻
甚至係連玩都唔會叻果隻....
所以今日食同類 真係有點於心不忍.....不過真係好好食^^

望下個日歷 就黎7.1喇啵
再記深d 原來回歸有十年喇啵
諗返起回歸前 呀老彭其實幾強下
一上任冇耐就整個新九組打鎚班大爺先
順手搞多個排污排下錢 可能佢知道d錢好污要排下
跟住係咁咦用幾件華人做d乜長物長
之後又整個蘇洲機場玩下
呢個一擔沙糖一擔屎既做法 真係食住唔少人

而我...就係其中一粒被老彭食住既番薯....
再諗返當時 我呢粒番薯仲俾人食得好開心添
冇辦法啦 我當時仲細 再加上o岩o岩(被個好鬼死大頭佛既農夫)掘起
貪威識食 得意忘形既我
又點會諗得到 老彭係一個咁高深既人呢...
佢係高到就算人都走左 仲會留一大堆麻煩野俾你
但係你又真係吹佢唔漲喎..
所以話 老彭呀老彭 你係得既!!
千古罪人個名其實唔襯你..個名都係留俾托你上位果d番薯先係真!!